நியூயார்க்: கிறிஸ்துமஸ் மற்றும் புத்தாண்டு விடுமுறை காலத்தில் அமெரிக்காவில் கொவிட்-19 தொற்று அதிகரித்து வருகிறது.
தற்போது அங்கு பரவும் தொற்றில் ஜேஎன்.1 என்னும் கொவிட்-19 துணைக் கிருமியே அதிகம் என்பது தெரிய வந்துள்ளது.
ஏற்கெனவே பரவிய பிஏ.2.86 கிருமி வகையிலிருந்து ஜேஎன். 1 உருவானது.
அந்தத் துணைக் கிருமி முதன்முதலில் கடந்த செப்டம்பர் மாதம் அமெரிக்காவில் கண்டறியப்பட்டது.
டிசம்பர் மாத நடுப்பகுதியில் எடுக்கப்பட்ட கணக்கெடுப்பின்படி, அமெரிக்கா முழுவதும் உள்ள கொவிட்-19 நோயாளிகளில் கிட்டத்தட்ட பாதிப்பேர், அதாவது 44 விழுக்காட்டினர் ஜேஎன்.1 வகைக் கிருமியால் பாதிக்கப்பட்டுள்ளனர்.
இது, நவம்பர் மாதம் 7 விழுக்காடாக இருந்தது என்று அமெரிக்க நோய் கட்டுப்பாடு மற்றும் நோய்த் தடுப்பு நிலையம் தெரிவித்து உள்ளது. டிசம்பரில் அதன் பரவல் வேகம் அதிகரித்து உள்ளது.
இதர வகைக் கிருமிகளைக் காட்டிலும் ஜேஎன்.1 வேகமாகப் பரவக்கூடியது என்பதை இது உணர்த்துகிறது என்றும் நோய் எதிர்ப்புத் திறனை முறியடிப்பதிலும் இதர கிருமிகளை இது மிஞ்சிவிட்டது என்றும் அந்த நிலையம் டிசம்பர் 22ஆம் தேதி வெளியிட்ட அறிக்கையில் குறிப்பிட்டது.