மாணவர் முரசு
இ-பேப்பர்
இளம் உள்துறைக் குழு பயிற்சிக் கழக அதிகாரிகளுக்குப் பயிற்சி அளிக்க நகைப்பழிகைகளும் (மீம்ஸ்) மெய்நிகர் தொழில்நுட்பமும் பயன்படுத்தப்பட்டு வருகின்றன.
அடுத்த தலைமுறை அதிகாரிகளுக்கு உகந்த வகையில் இருக்கவும் அவர்கள் தங்களுக்குத் தேவையான திறன்களை நினைவிற்கொண்டு, வளர்த்துக்கொள்ள உதவவும் பயிற்சியில் நகைப்பழிகைகள் பயன்படுத்தப்படுகின்றன.
குடிநுழைவுச் சோதனை முறை தொடர்பில் அதிகாரிகளுக்குப் பயிற்சியளிக்கப் பயன்படுத்தப்படும் நகைப்பழிகைகளை ஒரு செயலியின் துணையுடன் வருடலாம். குடிநுழைவுச் சோதனையை எப்படி மேற்கொள்வது, சோதனைச்சாவடிகளில் சந்தேகத்திற்கிடமானவர்களைக் கண்டறிவது எப்படி என்பன பற்றிய தகவல்களை அவை வழங்கும்.
அமெரிக்க நட்சத்திரம் சில்வெஸ்டர் ஸ்டாலோன் `ராம்போ' கதாபாத்திரத்தில் தம் இரு கட்டைவிரல்களையும் உயர்த்திக் காட்டும் படமும் அவற்றில் ஒன்று.
உள்துறைக் குழு பயிற்சிக் கழகத்தின் நேற்றைய பணித்திட்டக் கருத்தரங்கில் இவ்விவரங்கள் வெளியிடப்பட்டன.
இந்நிகழ்வில் பங்கேற்ற உள்துறை இரண்டாம் அமைச்சர் ஜோசஃபின் டியோ, உள்துறைக் குழுவின் மேம்படுத்தப்பட்ட கற்றல் மேலாண்மை முறையை அறிமுகப்படுத்தினர்.
கடந்த 2016ஆம் ஆண்டில் முதன்முறையாக அறிமுகம் கண்ட அம்முறை, பயிற்சி, மதிப்பீடு, சமூக ஒத்துழைப்பு ஆகியவற்றை ஒரே தளத்தில் ஒருங்கிணைத்து, மேம்படுத்தப்பட்டுள்ளது. செயற்கை நுண்ணறிவுடன் கூடிய மதிப்பீட்டு முறை பயன்படுத்தப்படும்.
உள்துறைக் குழுவின் 68,000க்கும் மேற்பட்ட அதிகாரிகளுக்கான முதன்மையான பயிற்சித் தளமாக அம்முறையை மாற்ற திட்டமுள்ளது.
உள்துறைக் குழு அதிகாரிகள் எதிர்காலத்திற்குத் தயாராக உள்ளதை உறுதிப்படுத்துவதில் உள்துறைக் குழு பயிற்சிக் கழகம் முக்கியப் பங்காற்றுகிறது என்று தொடர்பு, தகவல் அமைச்சருமான திருவாட்டி டியோ குறிப்பிட்டார்.
மெய்நிகர், மெய்மிகைத் தொழில்நுட்பங்களும் பயிற்சிக் கழகத்தின் முக்கியப் பயிற்சிக் கருவிகளாக இடம்பெறவுள்ளன. பயிற்சியின்போது அவை அதிகாரிகளின் கண்ணசைவையும்யும் எதிர்வினைகளையும் கண்காணிக்கும் என்பதால் அவர்களுக்கு ஆழ்ந்த அனுபவம் கிட்டும் எனக் கூறப்பட்டது.
வெவ்வேறு கற்றல் முறைகளையும் தொழில்நுட்பங்களையும் ஆராய்வதில் பயிற்சிக் கழகத்தின் துணிந்து முயன்று பார்க்கும் மனப்பாங்கை அமைச்சர் பாராட்டினார்.
"பாதுகாப்புத் துறை கண்டுவரும் மாற்றங்களுக்கேற்ப நாம் மாறிக்கொள்ளவும் ஒருபடி முன்னே இருக்கவும் இது உதவுகிறது," என்று திருவாட்டி டியோ குறிப்பிட்டார்.
