டிக்கெட்மாஸ்டர் நிறுவனம் வழங்கும் இசை நிகழ்ச்சிகளுக்கான நுழைவுச்சீட்டுகள் இனி சிங்போஸ்ட் கிளைகளில் விற்கப்படமாட்டா.
சிங்போஸ்ட்டின் பேச்சாளர் ஒருவர் ஸ்ட்ரெய்ட்ஸ் டைம்சிடம் இந்த விவரத்தைத் தெரிவித்தார். வர்த்தக ரீதியான ஒப்பந்தங்கள், முடிவுகள் ஆகியவற்றின் தொடர்பில் கருத்து தெரிவிக்க அந்தப் பேச்சாளர் மறுத்தார்.
தனது இணையத்தளம் வாயிலாக நுழைவுச்சீட்டுகளை வாங்க முடியும் என்று ஸ்ட்ரெய்ட்ஸ் டைம்சின் கேள்விகளுக்கு டிக்கெட்மாஸ்டரின் பேச்சாளர் குறிப்பிட்டார்.
இசைப் பிரபலங்களான அமெரிக்க பாடகி டெய்லர் சுவிஃப்ட், பிரிட்டனைச் சேர்ந்த கோல்ட்பிலே இசைக் குழுவினர் ஆகியோரின் இசை நிகழ்ச்சிகளுக்கான நுழைவுச்சீட்டுகளை சிங்போஸ்ட் கிளைகளில் வாங்க சென்ற ஆண்டு பலர் இரவு பகலாக வரிசையில் காத்திருந்தனர். நுழைவுச்சீட்டுகளை டிக்கெட்மாஸ்டரின் இணையத்தளத்தில் வாங்க முடிந்தபோதும் வாடிக்கையாளர்கள் அவ்வாறு செய்தனர்.
சிங்போஸ்ட் கிளைகளில் நுழைவுச்சீட்டுகள் கிடைப்பதற்கான வாய்ப்புகள் அதிகம் எனக் கூறிய அவர்கள், டிக்கெட்மாஸ்டர் இணையத்தளம் சரியாகச் செயல்படவில்லை என்றும் குறை கூறினர்.
இணையத்தில் நுழைவுச்சீட்டுகளை வாங்க முடியாமல் போனதால் வரிசையில் காத்திருந்து சிங்போஸ்ட் கிளைகளில் வாங்கும் முயற்சியில் இறங்கியதாக சிலர் தெரிவித்தனர்