மாணவர் முரசு
இ-பேப்பர்
லண்டன்: ஐரோப்பியக் காற்பந்துப் போட்டிகளில் இங்கிலிஷ் பிரிமியர் லீக் குழுவான வெஸ்ட் ஹேம் யுனைடெட் தொடர்ந்து 17 ஆட்டங்களில் தோல்வியடையாமல் சாதனை படைத்துள்ளது.
இங்கிலாந்தைச் சேர்ந்த எந்தக் குழுவும் ஐரோப்பியப் போட்டிகளில் இத்தனை ஆட்டங்களில் தோல்வியடையாமல் இருந்ததில்லை.
ஐரோப்பிய சாம்பியன்ஸ் லீக், பிரிமியர் லீக் ஆகிய இரண்டு போட்டிகளிலும் நடப்பு வெற்றியாளர் குழுவாக இருக்கும் மான்செஸ்டர் சிட்டி 16 ஐரோப்பிய ஆட்டங்களில் தோல்வியடையவில்லை. இதன் தொடர்பில் தற்போதைக்கு சிட்டியையும் பின்னுக்குத் தள்ளியுள்ளது வெஸ்ட் ஹேம்.
வெஸ்ட் ஹேமின் இந்தச் சாதனையை எண்ணி அதன் நிர்வாகி டேவிட் மோய்ஸ் மகிழ்ச்சி தெரிவித்தார்.
“ஐரோப்பியப் போட்டிகளில் 17 ஆட்டங்களில் தோல்வியடையாமல் இருப்பது எனக்கு மிகுந்த பெருமையைத் தருகிறது,” என்று வெஸ்ட் ஹேமின் இணையத்தளத்தில் மோய்ஸ் கூறினார்.
உள்ளூர் நேரப்படி வெள்ளிக்கிழமை அதிகாலை யூயேஃபா யுரோப்பா லீக் போட்டியில் வெஸ்ட் ஹேம், ஜெர்மனியின் எஃப்சி ஃபிரைபர்க்கை 2-1 எனும் கோல் கணக்கில் வென்றது. அதன் மூலம் ஐரோப்பாவில் தனது வெற்றிப் பயணத்தை 17 ஆட்டங்களுக்கு நீட்டித்தது வெஸ்ட் ஹேம்.
“சாதனை படைப்பது என்றும் சிறந்ததே. ஆனால் அதைவிட முக்கியம் இன்றைய ஆட்டத்தில் வெற்றிகண்டு மூன்று புள்ளிகளைப் பெற்றது. அதிலும் இந்தப் பிரிவில் ஆகச் சவாலானதாகக் கருதப்படும் குழுவை வென்றது சிறப்பு,” என்றார் மோய்ஸ்.
