மாணவர் முரசு
இ-பேப்பர்
பேங்காக்: ஆட்கடத்தல், பாலியல் உள்ளிட்ட குற்றங்களுக்காக 25 ஆண்டுச் சிறைத்தண்டனை விதிக்கப்பட்ட நிலையில், அமெரிக்காவிலிருந்து தப்பி தாய்லாந்துக்குச் சென்ற ஆடவர் பிடிபட்டார்.
செல்வ டெலானோ முதலியார், 37, என்ற அந்த ஆடவருக்கு அமெரிக்காவின் ஓரிகன் மாநிலத்தில் உள்ள ஒரு நீதிமன்றம் கடந்த மார்ச் மாதம் குறைந்தது 25 ஆண்டுகள் சிறைத்தண்டனை விதித்ததாகத் தாய்லாந்து காவல்துறை அறிக்கை தெரிவித்தது.
பிணை விடுப்பில் வெளியான செல்வ முதலியார் தாய்லாந்திற்குத் தப்பிச் சென்று, அங்கு கடந்த மூன்று மாதகாலத்திற்கும் மேலாக வசித்து வந்ததாகக் கூறப்பட்டது.
அவர் அவ்வப்போது தங்குமிடத்தை மாற்றிக்கொண்டே இருந்ததாகக் காவல்துறை தெரிவித்தது.
இந்நிலையில், செவ்வாய்க்கிழமையன்று (மே 7) பேங்காக்கில் உள்ள ஒரு கூட்டுரிமைக் குடியிருப்பில் வைத்து அவர் கைதுசெய்யப்பட்டார்.
முன்னதாக, செல்வ முதலியாரைப் பிடிக்க அமெரிக்கப் புலனாய்வுத் துறை, தாய்லாந்துக் காவல்துறையின் உதவியை நாடியிருந்தது.
அவர் விரைவில் நாடுகடத்தப்படுவார் என எதிர்பார்க்கப்படுகிறது.
“காவல்துறை தன்னைத் தேடி வருகிறது என்பதை முதலியார் அறிந்திருந்ததாக நம்பப்படுகிறது,” என்று தாய்லாந்துக் காவல்துறை உயரதிகாரி கொர்கியாட் உத்திஜம்னாங் செய்தியாளர்களிடம் கூறினார்.
மேலும், முதலியார் அமெரிக்காவில் எத்தகைய பாலியல் குற்றங்களில் ஈடுபட்டாரோ, அவற்றைத் தாய்லாந்திலும் அரங்கேற்றி இருக்கக்கூடும் என்று தாய்லாந்துக் காவல்துறை கவலைப்படுவதாகவும் அவர் சொன்னார்.
முதலியாரைப் பிடிக்க உதவியதற்காக பேங்காக்கிலுள்ள அமெரிக்கத் தூதரகம், தாய்லாந்துக் காவல்துறைக்கு நன்றி தெரிவித்துக்கொண்டது.
