மாணவர் முரசு
இ-பேப்பர்
சிங்கப்பூரில் மே 9ஆம் தேதி நடத்தப்பட்ட டோட்டோ குரூப் 1 அதிர்ஷ்டக் குலுக்கலில் சாதனை அளவாக, ஒரே பரிசுச்சீட்டில் $13.1 மில்லியன் தொகை பரிசளிக்கப்பட்டுள்ளது.
இதுவரை ஒரே பரிசுச்சீட்டில் வெல்லப்பட்ட ஆக அதிக தொகை இது என்று சிங்கப்பூர் பூல்சின் பேச்சாளர் உறுதிசெய்தார். இதற்கு முன்னர், 2023 அக்டோபர் 2ஆம் தேதி நடைபெற்ற பரிசுக் குலுக்கலில், ஒரே பரிசுச்சீட்டில் $13 மில்லியன் தொகை அளிக்கப்பட்டது.
மே 9ஆம் தேதி நடந்த குலுக்கலில் 9,15, 20, 26, 43, 49 ஆகியவை வெற்றிபெற்ற எண்களாக அறிவிக்கப்பட்டன. கூடுதல் எண்ணாக 36 அறிவிக்கப்பட்டது.
கடந்த மூன்று பரிசுக் குலுக்கல்களில் குரூப் 1 வெற்றியாளர் யாரும் இல்லை என்பதால் முதல் பரிசுக்கான தொகை மொத்தம் $13,123,509 ஆனது.
குரூப் 1 வெற்றியாளராக அறிவிக்கப்படுவதற்கு, ஒருவரின் பரிசுச்சீட்டில் வெற்றிபெற்ற ஆறு எண்களும் இடம்பெற்றிருக்க வேண்டும். ஒரு குலுக்கலில் அவ்வாறு யாரும் வெற்றிபெறாவிட்டால் அந்தப் பரிசுத்தொகை அடுத்த குலுக்கலின் வெற்றியாளருக்குச் சேர்த்து அளிக்கப்படும்.
மே 9ஆம் தேதியின் குரூப் 1 வெற்றியாளர், தனது பரிசுச்சீட்டை சிங்கப்பூர் பூல்ஸ் செயலியின் மூலம் இணையம் வாயிலாக வாங்கியிருப்பதாக டோட்டோ முடிவுகளை வெளியிடும் இணையத்தளத்தில் பதிவிடப்பட்டுள்ளது.
அதை ஒருவர் வாங்கினாரா, சிலர் பகிர்ந்துகொள்கின்றனரா என்ற விவரம் வெளியிடப்படவில்லை.
குரூப் 2 பரிசை 12 பேர் பகிர்ந்துகொள்கின்றனர். இவர்கள் தலா $127,391 பெறுவர். இவர்கள், சிங்கப்பூர் பூல்சின் சைனாடவுன் பாயிண்ட் கிளை, பைனியர் மால் கடைத்தொகுதியில் உள்ள ஜயண்ட் பேரங்காடி, உட்லே மால் கடைத்தொகுதியில் உள்ள ஃபேர்பிரைஸ் பேரங்காடி ஆகியவற்றில் உள்ள முகப்புகளில் பரிசுச்சீட்டுகளை வாங்கினர்.
குரூப் 1 பிரிவில் இதுவரை கிடைத்த ஆக அதிகப் பரிசுத் தொகை $19.4 மில்லியன் என்றும், 2022ஆம் ஆண்டு பிப்ரவரி 11ஆம் தேதி நடந்த குலுக்கலில் அந்தப் பரிசுத்தொகையை எட்டுப் பேர் பகிர்ந்துகொண்டதாகவும் சிங்கப்பூர் பூல்ஸ் பேச்சாளர் கூறினார்.
