சிங்கப்பூர் தேசிய விளையாட்டரங்கில் புதன்கிழமை இரவு நடைபெற்ற காற்பந்து ஆட்டத்தில் லயன் சிட்டி செய்லர்ஸ் குழுவை 5-1 எனும் கோல் கணக்கில் இங்கிலிஷ் பிரிமியர் லீக்கின் (இபிஎல்) டோட்டன்ஹேம் ஹாட்ஸ்பர் குழு தோற்கடித்தது.
இபிஎல் பருவம் தொடங்குவதற்கு முன்பு சிங்கப்பூருக்குச் சுற்றுப்பயணம் மேற்கொண்டுள்ளது ஸ்பர்ஸ். இந்நிலையில், புதன்கிழமை நடைபெற்ற ஆட்டத்தில் பிரேசிலிய நட்சத்திர ஆட்டக்காரர் ரிச்சார்லிசன் மின்னினார். இந்த ஆட்டத்தில் ஹாட்ரிக் கோல் அடித்து ஸ்பர்சின் வெற்றிக்கு அவர் வித்திட்டார்.
ஆட்டத்தின் இரண்டாவது பாதியில் ஹேரி கேனின் மாற்று ஆட்டக்காரராக ரிச்சார்லிசன், 26, களமிறங்கிய உடனேயே ஸ்பர்சுக்கு உத்வேகம் பிறந்தது. அவர் களமிறங்கியதைத் தொடர்ந்து ஐந்து நிமிடங்களுக்குள் இரு கோல்களைப் போட்டார். அவரது மூன்றாவது கோல் ஆட்டத்தின் இறுதியில் வந்தது.
ஆட்டத்திற்குப் பிறகு ஸ்ட்ரெய்ட்ஸ் டைம்சிடம் பேசிய ரிச்சார்லிசன், “ஸ்பர்சுக்காக முதல் ஹாட்ரிக் கோலை அடித்ததில் மகிழ்ச்சி கொள்கிறேன். எங்களுக்கு நல்லதொரு தொடக்கம் கிடைத்துள்ளது. இதே நிலையை இனி லீக்கிலும் கடைப்பிடிக்க வேண்டும்,” என்றார்.