கோழிகளில் நாட்டுக்கோழிகளும் பிராய்லர் கோழிகளும் உள்ளன.
இந்த இரண்டு வகை கோழிகளில் எது சாப்பிட்டால் உடலுக்கு நல்லது என்ற கேள்விகளைப் பலர் எழுப்புவதாக மருத்துவர்கள் தெரிவிக்கின்றனர்.
பிராய்லர் கோழிக்கும், நாட்டுக் கோழிக்கும் இடையே உள்ள சிறு வேறுபாடு கிட்டத்தட்ட நாட்டுத் தக்காளிக்கும் ஹைபிரிட் தக்காளிக்கும் இடையிலான வித்தியாசத்துக்குச் சமம்.
கிராமப் புறங்களில் வீட்டைச் சுற்றியுள்ள வெட்ட வெளியில் தானியங்களையும் மண்ணில் உள்ள புழுக்களையும் தானே தேடி உண்ணக்கூடியவை நாட்டுக் கோழிகள்.
இப்படி தினமும் வெளிப் புறங்களில் அலைந்து திரிவதால் நாட்டுக்கோழி இறைச்சியில் கொழுப்பு அளவு குறைந்தும் புரதச் சத்தின் அளவு கூடியும் காணப்
படுகிறது. ஆனால், அதே தானியங்களையும் தீவனத்தையும் பண்ணையாட்கள் கொண்டுவந்து வைக்க, உட்கார்ந்த இடத்திலேயே உண்டுகொழிக்கும் பிராய்லர் கோழிகளில் புரதச்சத்து மட்டுமன்றி கொழுப்பின் அளவும் அதிகமாகக் காணப்படுகிறது.
மேலும், நாட்டுக்கோழியுடன் ஒப்பிடும்போது இதில் அத்தியாவசியக் கொழுப்பு அமிலங்கள் சற்று குறைவாகவும் இருக்கிறது. ஆக, அத்தியாவசியக் கொழுப்பு அமிலங்களும் புரதங்களும் அதிகமாகவும் கொழுப்பு குறைவாகவும் உள்ள நாட்டுக்கோழியுடன் ஒப்பிடும்போது பிராய்லர் கோழியின் சத்து சற்று குறைவு தான். இருப்பினும், பிராய்லர் கோழியின் அதிகப் புரதச்சத்தையும் குறைந்த மாவுச் சத்தும் சரியான அளவில் சாப்பிடும்போது தீங்கொன்றும் இல்லை.
முந்திப் பருவமடையும் அச்சம்
இரண்டு விஷயங்களில் பிராய்லர் கோழிகளைப் பலர் சந்தேகக் கண்ணுடன் பார்க்கின்றனர்.
மருந்துகள் மற்றும் ரசாயனங்கள் சேர்க்கப்பட்ட செயற்கை உணவு பிராய்லர் கோழிக்கு வழங்கப்படுகிறது என்றும் ஹார்மோன் ஊசிகள் செலுத்தப்பட்டு இவை வளர்க்கப்படுகின்றன என்றும் நம்பப்படுகிறது.
இதனால் பிராய்லர் கோழியைப் பெண் குழந்தைகள் அதிகம் சாப்பிட்டால் முந்திப் பருவம் அடைந்துவிடுவார்கள் என்ற அச்சம் பரவலாக உள்ளது என மருத்துவர்கள் கூறுகின்றனர்.
முந்திப் பருவமடைதலுக்கு மாறிவரும் நமது உணவுப் பழக்கங்கள்தான் முக்கியக் காரணமே தவிர கோழிக்கு ஹார்மோன்களோ, ஸ்டீராய்டுகளோ வழங்கப்படுவதால் அல்ல என்று அவர்கள் கூறுகின்றனர்.
பிராய்லர் கோழிகளில் உள்ள அதிக புரதச்சத்தும் அதிகக் கொழுப்பும் பெண்களின் ஊட்டத்தை அதிகப்படுத்துமே தவிர பருவமடைதலை முந்த வைக்காது என்றே ஆய்வுகள் தெரிவிப்பதாக அறியப்படுகிறது.