வயது குறைந்த பெண்ணுடன் பாலியல் உறவு கொள்ள பணம் கொடுத்த ஆடவருக்குச் சிறை

வயது குறைந்த பெண்ணுடன் பாலியல் உறவு கொள்ள அவருக்கு மாதந்தோறும் $1,500 கொடுக்க முன்வந்து, அவருக்கு மிரட்டல் விடுத்த ஆடவருக்குச் சிறைத் தண்டனை விதிக்கப்பட்டது.

அந்த 17 வயது பெண்ணை முறையற்ற வகையில் காட்டும் காணொளி ஒன்றைத் தகவல் பகிர்வுத் தளத்தில் கண்ட பிறகு அப்பெண்ணை முகம்மது ருசாய்னி ஹசான் நாடினார்.

தமது உயிரை மாய்த்துக்கொள்ள அப்பெண் முன்பு முயற்சி செய்திருப்பது தெரிந்தும் அவரை முறையற்ற வகையில் காட்டும் இன்னொரு காணொளியைத் தமக்கு அனுப்பிவைக்கும்படி அப்பெண்ணை ருசாய்னி வற்புறுத்தினார்.

அப்படி அனுப்பிவைக்காவிடில் போதைப்பொருள் உட்கொண்டதாகப் புகார் அளிக்கப்போவதாக ருசாய்னி அப்பெண்ணை மிரட்டினார்.

அந்தப் பெண்ணை முறையற்ற வகையில் காட்டும் மற்ற காணொளிகளை ஆபாசக் காணொளி இணையப்பக்கத்தில் பதிவேற்றம் செய்யப்போவதாகவும் அவர் மிரட்டல் விடுத்தார்.

சிங்கப்பூரரான 33 வயது ருசாய்னிக்குப் புதன்கிழமையன்று (ஜூலை 2) மூன்று ஆண்டுகள், பத்து வாரச் சிறைத் தண்டனையும் மூன்று பிரம்படிகளும் விதிக்கப்பட்டன.